ԱՄՆ պետքարտուղարի՝ Եվրոպայի և Եվրասիայի հարցերով օգնական Ջեյմս Օ՛Բրայենը Բաքվում Իլհամ Ալիևի հետ հանդիպմանը հայտարարել է հայ-ադրբեջանական հարաբերությունների կարգավորմանը Վաշինգտոնի հանձնառության մասին. «Միացյալ Նահանգները պատրաստ է աջակցել խաղաղության
գործընթացին»:
Ամերիկացի դիվանագետը նշել է ամերիկա-ադրբեջանական համագործակցության կարևորությունը և արտահայտվել է ռազմավարական մակարդակով երկկողմ կապերի հետագա զարգացման օգտին։ Այս համատեքստում կողմերը քննարկել են տարածաշրջանային համագործակցությունը և Անդրկասպյան միջազգային տրանսպորտային երթուղու (Միջին միջանցք) գործարկումը։
Ալիևը հավելել է,
որ ԱՄՆ պետքարտուղար Էնթոնի Բլինքենի հետ վերջերս կայացած հեռախոսազրույցում
քննարկվել է երկկողմ հարաբերությունների լայն շրջանակ։
Հանդիպմանն
ընդգծվել է նաև Ադրբեջանի «կարևոր դերը» Եվրոպային էներգառեսուրսներով ապահովելու
գործում։ Օ՛Բրայենն ընդգծել է, որ ԱՄՆ-ն աջակցություն կցուցաբերի COP-29 կլիմայական
գագաթնաժողովի նախապատրաստման և անցկացման հարցում, որը կանցկացվի նոյեմբերին
Ադրբեջանում։
